姐匙Talk丨寵兒舊愛扮專一日日換女伴
姐匙talk
「寵兒」可謂愛情事業兩得意，甩拖冇耐就有型男新歡，最近仲傳有舊老細關照，唔愁冇工開。新世代小花唔怕將感情事放嘴邊，寵兒出道初期就最鍾意提起男友「QQ男」，講分手時外界都覺得好可惜。之但係睇嘢唔可以太表面，Jessie有位姊妹爆料，話QQ男其實好花心，成日周圍flirt女仔，姊妹都差畀對方打動。
爆料姊妹話QQ男同寵兒拍拖期間，因為被女友「目及」得太實，所以插翅難飛，但分手後即孔雀開屏，經常喺社交網識女仔。而且佢媾女手段都幾高明，一開始唔會飛禽大咬，而係同你傾心事，不停話自己對寵兒未忘情，畀人一種專一、情深嘅感覺。
QQ男平時出入都會揸靚車，但佢唔會充大頭鬼，反而係扮窮博同情，狂呻以前同寵兒一齊幾咁冇自由，但仍深愛對方，仲袋住一張向前女友爸爸借錢嘅六位數字借據，話用警惕自己要發奮做人。姊妹話QQ男鍾意扮情聖，日日約唔同女仔食飯，但又保持少少距離，令對方有若即若離嘅感覺。直到佢多次被人影到同唔同女仔一齊，早前又貼出一張同靚女嘅合照，即令唔少以為有機會嘅女仔幻想破滅，隨即秒刪QQ男嘅社交賬號，仲刪走兩個人嘅約會相，令QQ男一夜間冇咗好多「蜜友」。
-----------------------------
-----------------------------