黃秋生、林海峰(Jan)同韋羅莎合演嘅舞台劇《搞大電影》，噚晚喺灣仔演藝學院完成尾場演出，導演甄詠蓓連同三位演員一齊現身謝幕，三人異口同聲話雖然籌備過程好辛苦 ，但嚟到最後一場感覺又有啲唔捨得。

秋生話：「我咁多年嚟做戲都冇唔捨得呢個感覺，因為已經好麻木，但今次真係有好強烈嘅感覺，因為個個都好努力，加上個劇本同對手。」

Jan就對住秋生同韋羅莎話：「我星期一就要返去繼續《在晴朗的一天出發》，但係就會好掛住你兩位對手，今次呢個劇對我嚟講好似一個Refresh咁。」問到三人既然個做得咁開心，有冇諗過再度演出？Jan即刻話：「最好唔好啦，俾我唞下先，真係好難頂。」

秋生就話：「都冇場地，演藝要一年前Book定，外面啲商業場更加唔使講，所以經過今次都冇咩機會再見㗎喇。」秋生再補充話：「其實個劇最好係起碼可以做到廿幾場，因為我哋演出係有一個默契，會越演越好，通常去到十四、五場後，就會越嚟越精采，但今次只係開到十四場就完，真係冇辦法。」