韓國天團BIGBANG噚日完成巡迴演唱會最後一站，同晚舉行完演唱會嘅李準基，齊齊喺今日離港。喺上晝11點，已經有過百粉絲抵達機場，佢哋各自高舉印有偶像嘅橫額同燈牌。

到下晝12點45分，穿上黑色冷帽、黑衣黑褲、戴口罩嘅BIGBANG成員T.O.P由工作人員陪同到機場，T.O.P見到粉絲即時揮晒手，又用手整心心手勢送畀粉絲，隨後有勝利同大成現身，佢哋見到粉絲都有揮手，當三子由秘密通道入去禁區後，成班粉絲又一窩蜂衝到禁區外，目送三子離港。

隔咗半個鐘多啲，即大約下晝1點25分，李準基由工作人員陪同下到機場，由於事前冇獲安排行秘道，所以李準基只係由職員通道入禁區。向來親民嘅李準基，沿途為粉絲簽名、揮手、送飛吻，亦有整心心手勢，搞到粉絲好開心，不停大叫Oppa，李準基仲以普通話同粉絲講「新年快樂」，原本5分鐘嘅路程，最終要差不多10分鐘先行到，佢經職員通道入去，到咗禁區，李準基再返轉頭伸出半個身位同粉絲握手。