今年冠軍一哩賽日，一對神級騎練雷神、大摩旺爆，兩人連汁都撈埋，第十一場三班千四米，合作再贏「飛來猛」，兩人全日合計分別贏五場及中三元，當中雷神擊敗郭能做騎師王，個人第四次在港一日五捷，大摩亦一下子由原本在龍虎榜落後兩win，變為反先方嘉柏一場重上榜首。
「飛來猛」戰鬥力真係好勁，出道兩季跑咗十場入晒前四名，總成績三冠三亞兩季兩殿，所有頭馬由雷神一手包辦，人馬堪稱最佳拍檔。
尾場放得鬼咁快益晒後上馬，一對華將座騎兼新勝馬「星夢」同「平天下」鬥放互燒，其中一段放到21秒09，卒之兩敗俱傷，直路任過唔嬲，「飛來猛」同「酣睡密碼」分從外叠殺上，結果分列冠、亞軍，贏開之「吉祥」齋跑拉士幾十米，衝過攝內欄上之大熱門「藍天飛馬」得第三，後駒梗頸四。
雷神全日頭馬分別為「齊齊健康」、「澳斯卡」、「大家熊」、「步步友」及「飛來猛」，季內已勝108場，很快可追過114場韋達一季最多頭馬紀錄。
至於大摩賽後大讚莫雷拉留放出色，「飛來猛」目前只得三歲，仍有進步空間，前景樂觀。