太古系上周五公佈,主席白紀圖明年3月退任,由史樂山頂上,史樂山喺集團33年,57歲攀上主席之位,認真唔簡單。佢2007年調任國泰前,係太古飲料CEO,於是乎,佢每次主持國泰記者會,面前總有一樽可口可樂,賣免費廣告賣到出面,難怪英國老闆錫晒佢。
佢仲要娶一位國泰空姐做老婆,同集團關係密切到不得了。史樂山太太Joy係泰國人,80年代初做國泰空姐,靚女到被公司揀做代言人,即係影張靚女相做紙板公仔嗰種,史樂山果然有眼光。聽聞兩人婚後,Joy就專心相夫教子,兩人育有一對仔女,阿女都差唔多20歲。
舊年3月國泰舉行業績記者會,史樂山太太就曾經着住成套高貴嘅黃色套裝,坐喺台下默默地為史樂山打氣。明年3月之後,佢就可以主席太太身份為史生打氣了,由空姐變為主席阿太,應該都係傳奇。
李華華
mailto:
[email protected]