【新增內容及圖片】
早前襲港宣傳電影嘅27歲韓片《青年警察》男星姜河那，將於今日下午入伍，今早佢於Instagram公開朋友幫佢剃頭髮嘅照片，表示好耐之前已經打算服兵役時，一定要好友為佢剃頭髮，今次終於實現願望，非常感謝一眾好友。

姜河那表示過去遇到嘅都係非常可愛嘅作品，覺得好幸運，承諾：「新嘅環境、人、氣氛，所有事都令人期待，我會帶住笑容度過呢兩年。」

而姜河那當兵前跟家人見面，而曾跟佢合作韓版《步步驚心》嘅女歌手IU都有去見姜河那，二人合照於網上曝光後即傳戀情，不過姜河那方面已否認緋聞：「姜河那跟IU唔係戀人關係，只係好好嘅朋友。」

姜河那今日韓國時間下午2時，於家人陪伴下去論山訓練所入伍，預計2019年6月10日退伍。戴上帽及口罩現身嘅姜河那，於訓練所外見到粉絲即露出燦爛笑容，更除口罩跟粉絲自拍。