【新增Billboard談GD USB專輯內容及照片】
韓國選秀節目《PRODUCE 101》喺韓國人氣勁高，當中擁有BIGBANG、iKON、BLACK PINK等團體嘅YG事務所將推出YG版《PRODUCE 101》。

根據韓國傳媒報道，YG下半年將製作不同節目，當中主打則是YG版嘅《PRODUCE 101》，相關人士透露曾製作《PRODUCE 101》及《Show Me The Money》嘅韓東哲PD將會製作新節目，今次亦會係YG首次聯手其他事務所，喺無名嘅新人組合中親自選拔成員，並組成新嘅團隊，有指評審將有機會由YG老闆楊賢碩，聯同YG金牌製作人Teddy、BIGBANG嘅G-DRAGON（GD）同太陽、PSY等人擔任。

除咗YG版《PRODUCE 101》外，YG亦將推出YG旗下30名練習生出演嘅淘汰賽節目，佢哋將要進行比賽，勝出者先有得留低，而YG嘅練習生房藝談將出演呢個節目。

同時亦會為旗下男團女團BLACK PINK、WINNER、iKON等製作真人騷節目。

另外，GD早前推出嘅專輯《權志龍》因為以USB形式公開，所以韓國音樂產業協會認為USB唔可以被視為音樂專輯，令GD呢隻專輯唔可以紀錄於韓國權威流行榜Gaon嘅專輯銷售榜單，而日前Gaon就發表官方立場指USB專輯不能當音樂專輯，故決定不能計算銷量。事件仍然在發酵，就連美國Billboard都探討有關話題，而喺Billboard方面就指雖然Gaon就唔計呢張USB入專輯榜，但喺Billboard方面就仍然會計算，有唔少網民即留言話：「時代跟唔上GD」。