【林爺爺主辦】40位中國小姐見傳媒 佳麗燕瘦環肥殭屍妝樣樣齊
林建名中國小姐
《2017中國小姐大賽》今個星期五喺香港舉行,林建名係是次活動聯合主辦商之一。40位來自中、港、台、澳不同地方嘅參賽者今日穿著三點式,喺九龍城廣場宣傳。喺芸芸佳麗中大部分化妝都粗媚、打深鼻影、有啲仲好似殭屍妝,亦不乏人工美女,但勝在大部份高頭大馬,相對來自台灣同香港選手比較矮細,年齡層最細由17歲開始最大27歲。
喺眾多佳麗中騎呢多於正常,平均質素非常一般,只得33號來自遼寧省葫蘆島嘅蔡一丁同37號來自北京王文卿稱得上後生又靚女,兩人同任模特兒,不過王文卿雖樣貌標緻,但為要保持模特兒身形,腹部肋骨盡現,有如火柴人。
王文卿受訪時說:「我是當專業模特兒,平常有運動,需要控制飲食保持身材。」瘦到連胸都冇肉?她說:「平胸也是一種美,骨感美。」另一樣子甜美佳麗蔡一丁透過大會轉達因為整傷面部而拒絕受訪,王文卿說:「我和她是同一家模特兒公司,她走到不小心撞到門框,撞到個門框,有一個小傷口,但不嚴重。」兩位成叮噹碼頭競敵?王文卿說:「沒有,我們是朋友,還好的。」
24號劉千瑜擁36寸最豐滿上圍,亦係最年長佳麗27歲,佢話:「曾經代表中國去過台灣、埃及、土耳其等地方參加選美。身材豐滿,現在會加緊操練,覺得自己偏胖。」至於年齡方面,佢話:「自己是比其他選手大幾歲,但不會構成落敗原因,自己曾參加過很多選美,經驗豐富,每人有不同優點缺點。」而1號來自台灣周冷霓雖然個子最矮小,但笑容搭夠,佢話矮不重要,佢嘅笑容可以帶俾人開心感覺。
更多娛聞,喺晒《娛果》
http://fb.com/appledailyent
33號蔡一丁樣子甜美,令人留下深刻印象,但最難忘仲係佢身上嘅膠布。完騷後佢以面部受傷為由,拒絕受訪。