澳洲勢力在周六賽事雖冇周日咁強，但這天於沙田馬場，都見到大摩同潘頓兩鄉里攜手贏馬，佢哋於第八場三班1200米，全日最後一場泥地賽，憑「花月流星」爆冷捧走夏佳理錦標。
大摩去年夏佳理錦標以韋達策「舞林高手」奪標，一年後在同一賽事，改以潘頓做殺手，結果成功衛冕呢項錦標，個人連續第15次沙田賽事有馬贏未斷纜，今季頭馬上到39場，仍排龍虎榜第四位，季內所獲的總獎金在今場後，更升至超過9,960萬元，只差約40萬便會是其個人連續第六季拎到過億元總獎金。
「花月流星」賽前從未跑過泥地賽，亦未由潘頓騎過，結果一次過擦出火花，8檔起步沿途守內欄慳位跑，直路沿欄長臨直進，爆出11倍半冷獨贏，五歲馬季內累積兩捷，組合獨贏開A3並派26.5元，馬主包大偉今季兩次贏馬均靠此駒，而這天沙田三項泥地賽清一色由8檔馬勝出，順序為頭場「至尊駿爵」、第六場「機緣再現」及第八場「花月流星」，亦成為一時佳話。
今場前四名都係10倍以上半冷馬，11倍「花月流星」勝出，12倍「藍天飛馬」落飛搏失做二奶，14倍「勁開心」跑第三，第四名則是11倍「勁優秀」，四重彩派10萬蚊鬆啲。