《點五步》今日(25號)上映，前日有自認係該片工作人員，撰文斥《點五步》導演搵學生笨唔俾人工，又濫用「熱血」作包裝；噚日導演已表明「我哋係經浸會大學介紹，搵電影系學生幫手。搵人選之前都經過interview，嗰時已經講明冇錢，就算有都係得好少。亦都講明你哋假如拍落覺得時間唔許可、或者唔慣，可以隨時離開，當然最好就係早少少通知。」

之後相繼有電影工作者出嚟反駁該名「工作人員」對導演之指控，《點對點》導演黃浩然話：「點解乜都唔識嘅人，可以振振有詞亂講一通？有病？痴線？」

游學修噚日都忍唔住出嚟講兩句：「見過網上有人曾因為討厭某導演而以劇透形式惡意打擊票房；昨日又見有人以匿名身份在上映前一天撰文攻擊電影，其他電影crew卻表示慘『被代表』發言。」

游學修話相比起叫人唔好去睇戲，不如同其他人講：「這個導演曾經XXX」、「這個商品是抄襲XXX的」，以事實服人。如果嗰啲知道後仍然願意幫襯，咁就係佢哋嘅品味、價值觀問題。游學修：「相信電影會Speak for Itself。」游學修並謂：「創作人是否黑心、消費別人、惡俗、求其，電影本身會告訴你的。而《點五步》是我今年繼《樹大招風》、《導火新聞線》後，會大力推薦的好戲。8月25上映。」

杜汶澤今日去咗睇《點五步》撐港產片，佢睇完喺facebook話：「贏就一齊贏！輸就一齊輸！《點五步》！DXXM 勁呀！啱啱睇完依家個人仲好亢奮，可能我個人比較感性啦我有喊囉，你咪去睇屍殺列車囉，所有人都演得好好，唔係講棒球而係講人生嘅一部勵志片，本土電影萬歲，好X感動。」

佢以WhatsApp回覆話：「《點五步》呢開頭以為係棒球片，直至睇完發覺講人生嘅戲，所有演員做得咁好，用咁少錢拍得咁好。又畀我諗返細個時候，有好多回憶，人生路上抉擇同睇贏輸，令我覺得作為本土電影製作人，見到曙光。唔係好似杜汶澤咁拍埋啲三級片呀，或者標榜本土又毫無意義電影。」