華億新媒體（419）主打祖國多媒體業，純利係斷倍計，兼且係最平嘅媒體股，有權翻一番。華億主打祖國電影電視製作，兼撈埋廣告代理及衞星電視，06年度中期（6月止）純利暴升42倍到2.5億銀。就算扣除營運以外嘅一次性收益，集團嚟自廣告、電視、電影製作嘅申報溢利，講緊9150萬銀。君真啲以核心業務計數，估計華億全年度純利1.4億銀，現價7.5仙，PE得6.8倍。近磅股鳳凰衛視（8002）預期PE30倍、勤+緣（2366）都講緊10倍，華億又係平通街。
再講，華億媒體業主打祖國市場，加上祖國廣告市場，單係電視廣告規模，講緊係400、500億銀晒士。無論華億業務前景，或者玩「ChinaPlay」元素，強到爆。斷估若果華億喺美國，就算以15、20倍PE上市，海外投資者都掩住半邊嘴話平到笑。華億現價翻一番到0.15元，PE都係講緊13倍。

華藝大把水位

國際銅價今年以嚟彈咗20%，睇勢仲有得彈，華藝銅業（559）有得諗。華藝主打銅桿、銅線業，唔係江銅（358）瓣數。但呢期銅價彈升，主要係炒祖國需求增加。華藝作為下家生產商，受惠祖國需求，兼且可以成本轉嫁，生意繼續好景，又唔驚毛利蠶食。華藝1年打底冇升過，現價0.53元，大落後，呢轉短打博升20%，華藝見0.64元，未有耐到NAV0.75元水位。
錢雋