澳職周五上演墨爾本打吡，勝利靠巴巴路西斯比賽初段嘅入波，加上利萊佐治力壓墨城守衛頂入，最終以2:1擊敗墨爾本城，為周中亞冠壯聲威。

比賽前，馬會讓球盤由平手盤改成勝利讓平半，而勝利亦不付眾望，開波短短1分鐘，巴巴路西斯尾柱接應隊友左路傳中先開紀錄，及後球證要求VAR協助執法，慢鏡發現前柱嘅貝利沙越位在先，雖然未有參與進攻，但球證認為有影響門將保奧辛尼斯之嫌，推翻入球。不過，戰至12分鐘，巴巴路西斯接應貝利沙傳送，成功為勝利領先。兩隊其後踢得相當火爆，上半場尾段更加大打出手，但未有球員被逐。

下半場54分鐘，墨爾本城搏到12碼，由今季仲未開齋嘅科拿路利操刀，一射中鵠，追成1:1。但係墨城開心無耐，就畀勝利嘅布洛斯咸左路一記傳中，利萊佐治搶點下頂入，為勝利再次領先。比賽尾段，墨城連龍門都出埋黎，畀杜羅奧斯有射門嘅機會，點知竟然斜出，維持比數2:1完場。

--------------------
踢出我天地！【HUNGRY HEART X BFB CHAMPIONS 2.0】合作活動登場！登入即得主角★7葉恭介！ http://bit.ly/2xrTKGM