港鐵近年故障頻繁，其中以今年10月16日的四綫齊冧最嚴重，其實近年港鐵除壞車及大小故障多多，沙中綫又爆出超支及鋼筋鏍絲安全不合格等醜聞，令人質疑港鐵管理無能，管治失效，理工大學應用社會科學系助理教授鍾劍華指，港鐵近年接連爆出問題，反映管理層管治有大問題，作為港鐵最大股東的港府責無旁貸，港府應找出解決辦法，挽回市民對港鐵信心。

他續稱，香港鐵路的營運在世界上很出名，港鐵亦多次輸出海外，其實近年港鐵不斷在中國內地，澳門及海外拓展及營運鐵路項目，包括北京地鐵四號綫、深圳市及杭州地鐵綫，澳門輕軌氹仔線及澳洲墨爾本都市鐵路等，不過他指自從2007年地鐵與九鐵「兩鐵」合併後，發現港鐵監管接連出問題；他承認港鐵班次頻密又準時，一直令港人自豪，但近年事故越來越多，但每次管理署都歸咎系統老化，訊號故障，「都經過咁多年，仲未搵出一個改善方法，而港鐵高層亦毋須負任何責任。」

「除了故障，仲有超支，剪鋼筋，睇到管理層十分傲慢，高層在事件揭發初期還否認，政府又有少少包庇。到了件事越揭越大，越揭越多的時候，就搵幾個工程總監，高層職員停職，或者即時離職來處分。」鍾劍華指港鐵「年年賺錢，年年加價，出事時又無人負責，係最令人氣憤嘅地方。」他直言港鐵管理層確實出了問題，懷疑董事局不能有效監管，或是有高層隻手遮天。

他認為，要糾正港鐵管理問題要靠港府出手，因為政府作為港鐵最大股東，在董事局入邊應該主導性強些；政府委任的董事，除了官員與政府友好人士外，應考慮加入對鐵路有認識，同時有較強民意授權的立法會議員。他建議可考慮委任熟悉交通事務的立法會議員加入港鐵董事局，「安排警覺性高啲，監察意識較強嘅人入董事局，早啲扮演狼來了嘅角色。」希望可以及早發現問題加以解決，避免事件爆煲。

記者：林熊 攝影：麥超億

你敢爆，我敢獎！ 立即WhatsApp《蘋果》24小時爆相爆片熱線 或致電：63836568