當年今日
關於我們

否認放生電發嗲功
馮仁昭四圍超:楊思琦認去李永豪房傾偈

蘋果日報 2002/08/09 00:00


鄭少秋、汪明荃、楊思琦、林峯同李永豪等成班演員,噚日喺將軍澳新電視城為無綫新劇《血薦軒轅》進行開鏡拜神,無綫特別向各藝員大派開工利是,秋官重即場向阿姐送上熱吻,搞到阿姐好鬼開心。

十日冇返房瞓
有報道話楊思琦拍劇時,經常放生電同發嗲功,楊思琦就話:「我身邊嘅朋友冇人話過我。」
報道又話佢同李家鼎個仔李永豪,因一齊拍呢套劇而日久生情,女方重去埋男仔屋企過夜,楊思琦即場否認話:「唔係事實,我最近同媽咪搬咗去西貢方便返工,但搬去邊我唔需要透露,我唔覺得佢對我有意思,大家係同事,絕對冇男女朋友嘅感覺。」
至於楊思琦喺內地拍劇期間,十日都冇返房瞓,佢就解釋:「我自己未試過唔返房瞓,我係有去過李永豪間房傾偈,佢爹哋都喺度。」

《天脈傳奇》趕逐奧斯卡
電影《天脈傳奇》票房理想,監製鍾再思話已經賣咗《天》片嘅美國版權畀Miramax公司。
佢哋𠵱家重爭取緊套戲年尾喺美國上畫,如果成事,《天》片就可以趕到提名下年嘅奧斯卡金像獎,而楊紫瓊主演呢部《天》片,大有可能會繼《臥虎藏龍》之後,獲美國本土影片及外語片提名。

張可頤被叫「晶片」
張可頤係無綫新劇《烈火雄心Ⅱ》嘅女角之一,佢嘅戲份當然唔少啦,但原來張可頤喺拍攝期間,繼續發揮佢一貫嘅遲到本色,重試過失場冇到,冇人搵到佢,而佢就好似人間蒸發咗一樣,所以啲幕後工作人員咪幫張小姐起咗個「晶片」嘅花名,意思係話佢會隨時消失。
黎明貪新換手機
娛樂圈最興玩一窩蜂,近排Nokia出咗部可以用嚟影相嘅電話,雖然個電話得一隻色,機身又重,但就勝在有新意,可以即刻同朋友影相留念。除咗李克勤有呢部電話外,原來黎明都貪得意買咗呢部電話玩,相信部電話好快就會「雄霸」娛樂圈。

黃凱芹十月開騷
闊別香港樂壇多年嘅黃凱芹(Chris),喺十月頭會開一至兩場演唱會。張耀榮噚日話一切已經落實,佢哋重會喺下個月召開記者會交代所有詳情。
至於嘉賓方面,張耀榮話會留番畀阿Chris自己決定,唔知佢會唔會請好友周慧敏復出呢?

陳奕迅大馬行程密
陳奕迅今晚會喺馬來西亞,開始佢一連串嘅宣傳活動,聽日晏晝佢會同大班fans喺大馬嘅卡拉OK聚會,舉行一場簽名會。
陳奕迅聽晚重有一場音樂會,行程好緊迫,不過今晚佢應該都可以抽到時間去食吓佢至鍾意嘅大馬美食嘅!