周潤發喺主演嘅電影《寒戰II》入面飾演資深大狀，而之前舉行嘅首映禮發哥冇出席睇唔到首映，所以噚日佢就身體力行，同發嫂陳薈蓮去咗鑽石山荷里活廣場，仲好平民化咁親身排隊買飛捧場。

一身行山Look嘅發哥同發嫂現身戲院排隊購票，因為發哥身材高大，即刻俾排喺佢前面嘅市民認出，發哥非常有規矩唔鍾意要特權，所以即使有市民主動畀佢先行購票，佢都婉拒而且跟足規矩排隊。排隊期間，發哥一如以往咁有求必應，不停同前嚟要求自拍嘅fans玩自拍。

買完飛後發哥見仲有唔少市民將佢「重重包圍」，發哥亦把有滿足佢哋要求。其中一位女士未睇戲先發功，用發哥戲中嘅金句招呼發哥：「我下半世咩都唔做，剩係招呼你一個。」發哥聽到之後笑笑口話：「吓？淨係招呼我？」到臨近開場時間，發哥眼見仲有好多市民想同佢自拍，忍唔住要講句：「你哋仲睇唔睇戲㗎？睇完大家一齊影啦！」

發哥睇完戲仲同現場觀眾即興搞咗個分享會，發哥講笑話城城同梁家輝係佢偶像，兩個演得都好好，仲大賣關子話：「應該有第三集，睇下家輝臨尾望住嗰仔嘅表情。」場內好多觀眾大叫「發哥好有型」，搞到發哥話：「我嚟睇場戲啫，你哋講埋咁多呢啲嘢，我怕今晚瞓唔着喎！」