封鎖灣仔維景酒店七日，特首煲呔宣佈香港成功防止豬流感社區爆發，小勝一仗，正當煲呔期待民望回升沾沾自喜之際，食物及衞生局局長周一嶽噚日就爆料，指香港仲有人未把好關，防疫戰線隨時失守，呢個消息，真係令人震驚！
立法會衞生事務委員會噚日討論預防及控制豬流感措施，民建聯陳克勤指洗手有效防疫，建議當局加大宣傳力度，最好日播夜播電視廣告，周一嶽深有同感，隨即透露立法會都有唔少邋遢鬼，表示喺立法會洗手間度，曾目睹有人如廁後唔洗手！
唔係啩！咁得人驚！堂堂立法會議員竟然咁邋遢！幼稚園學生都識「屙o殊o殊」後要洗手，董太更加不厭其煩，叮囑港人記得、記得、記得，洗手、洗手、洗手，議員身為民意代表卻咁核突，真係令人失望。周一嶽此言一出，全場議員嘩然，議論紛紛猜測誰人咁冇公德，須知道如廁時可能整濕手，唔洗手嘅話，即係將成手尿隨處揩，變相整污糟全個立法會，其他人真係唔驚就假。

邋遢議員係男人

局長所指「邋遢會議員」係男人，在場兩個女議員余若薇同何秀蘭不禁嚇到花容失色，指住在座男議員叫他們從實招來，余若薇指住梁家騮笑稱：「係咪你，肯定係你﹗」騮哥係醫生，應該唔會咁冇衞生，佢又話未見過有議員如廁後唔洗手。陳偉業則指市民有時唔洗手都係為勢所迫，因為好多公廁冇自動水龍頭，甚至洗手梘液都冇，用手開關水喉反而有惹菌風險；李國麟話立法會廁所都冇自動水龍頭，未達到最高衞生標準。
周一嶽冇透露邊個議員咁邋遢，八方質疑局長有失職之嫌，事關家陣全民皆兵抗疫，如果有議員唔合作，將病毒、細菌四圍散播，防疫措施有漏洞失守，後果不堪設想。基於公眾利益，八方認為周一嶽應該立即披露「邋遢會議員」名單，市民、選民避之則吉，必要時甚至下令隔離，唔畀佢哋播毒，立法會亦要考慮引用權力及特權法「尚方寶劍」要求局長提供資料，保障市民健康，車公早就預言香港「內有家鬼」，唔揪出呢隻邋遢鬼，香港永無寧日呀！

mailto:[email protected]