黃婉曼噚晚喺鰂魚涌接受奇妙電視嘅節目訪問，同主持司徒瑞祈傾吓生意經。做咗少奶奶嘅黃婉曼，結咗婚冇耐去咗東京報讀法國藍帶麵包製作課程，之後又投資咗7位數字開設麵包學校，唔知黃婉曼有冇親自教授呢？佢話：「我邊有資格教人，啱啱開學校嗰陣，我又有咗BB，所以我搵咗一個老師去教。」

黃婉曼仲話：「o依家學生報名數係開業嗰陣嘅三倍，我嘅終極目標係開地舖，不過我哋都有喺網上接生意，O依家好多大學生都喺網上創業，所以要好好同佢哋學習。」至於啲學生整完嘅麵包又會點處理，佢就話：「有啲佢哋會拎走，其他嗰啲會捐去俾啲慈善機構同學校。」

同樣有開小食店嘅司徒瑞祈，佢話：「如果唔使做節目同教游水嘅話，我每一日都會返舖頭，o依家開咗只係8、9個月，暫時都未回本，所以要勤力啲。」

精選娛聞，喺晒《娛果》
http://fb.com/appledailyent