李八方online︱田二少約大佬食burger🍔訴心聲：阿哥，我不想努力了！
蘋果日報 2020/12/02 19:15
田北辰田北俊李八方online
田北辰（左）今日喺Facebook出po，上載自己同阿哥田北俊（右）喺快餐店食漢堡包嘅合照。田北辰Facebook圖片
引發最大規模感染嘅跳舞群組，男女性染疫患者年齡差距惹人遐想，全城熱議「阿姨，我不想努力了！」呢句潮語。抗疫疲勞、經濟惡劣的確讓人心很累，就連睇住成盤本地連鎖時裝品牌生意嘅實政圓桌立法會議員田北辰，都要搵阿哥、萬泰集團主席田北俊講句：「阿哥，我不想努力了！」
田二少今日喺Facebook出po，上載自己同阿哥喺快餐店食漢堡包嘅合照，好鬼抵死又貼地咁話我終於搵到個對的人，可以講呢句說話：「阿哥，我不想努力了。」
田北辰Facebook截圖
二少同八方講，平時同大少都有聚餐，但今日因為食厭咗中菜，加上疫情下，通街都少咗人，所以唔去酒店餐廳食飯，走咗去比較開揚嘅快餐店。似乎食慣fine dining嘅二少仲話自己點餐、拎餐具，同阿哥兩支公食burger，都真係第一次。
當然二少話不想努力了都係講下笑，但佢話佢出呢個post係真係有另一層意思，而大少係未必知道嘅。就係佢盤生意係要交租、阿哥相反有租收，所以疫情之下，佢即使生意大都係捱得苦，所以啱啱呢餐午餐當然係大少埋單。
大少咁有米，當然唔怕埋一張半張單，可惜市民覺得特區政府抗疫不力，要全港上下一齊埋單嗰下苦。二少話戴口罩、勤洗手係新常態，感嘆全球疫情搞唔掂，香港作為開放型城市都好難獨善其身，佢目前只希望政府做好輸入個案防範工作，特別係機場開始嘅隔離、檢測措施。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！