警察公共關係科黃姓高級督察被捕，涉嫌今年八月至十月間於警察總部內偷竊，案件正在調查中，疑似賊贓包括頭盔、手套、相機電池和……罐頭鮑魚！警局有前三樣物品供盜取不奇怪，但最末一款就非常出人意表，可見原來有警員帶着罐頭鮑魚去返工，堆在枱頭引起同袍垂涎，他或她大概嫌外賣豆腐火腩飯味道太寡淡，隨時開罐海產放入微波爐叮一叮加料，聊以替代念念不忘的海底撈。果然隔行如隔山啊，打寫字樓工的中環麗人和在牛池灣廠房捱世界的藍領，餐餐都食銀芽和白菜，又點諗到紀律部隊咁識嘆，人一世物一世，好應該急起直追，今日就去海味鋪掃貨。

盡責的記者報導新聞，列出近年與警察有關的罪案給讀者參考，蓄意落格有之，順手牽羊有之，教人眼界大開，可惜緊張大師希治閣已經長眠地下，否則開拍《神秘賊美人》續集大把題材，甚至可以發展成系列賣畀Netflix。橋段最具「凡爾賽文學」潛質的一單，發生在去年十一月長沙灣警署報案室，當值阿蛇收到價值四十幾萬的手錶失物，一個唔該落咗自己袋，再從儲物櫃摷出一隻A貨時計頂替，調包計水準直逼《紅樓夢》的洞房花燭夜林黛玉換上薛寶釵。作為無可救藥的濕平精，我最肉緊的則是劉姓男警公餘兩次去優衣庫施展空空妙手，共偷了十六件合計一千五百元的衣物。這位密食當三番的高買蛇肯定沒有向茄士咩冷衫埋手，如果唔係偷兩件都過千蚊，現在這樣，可想是左一條七十九元內褲，右一件一百二十九元印花tee恤，太冇志氣了。