恭喜！恭喜！白雲今日就同香港先生江俊霖結婚，真係可喜可賀！

講到白雲，佢並唔係天上嘅一片片嘅白雲。

原名白雲鳳嘅白雲，今年28歲，原來佢有滿洲正白旗嘅血統，佢仲參加過2011年嘅香港小姐，雖然佢擁有嬌人嘅35E上圍，可惜最後未能入圍。

雖然白雲未能入圍，但就俾當時仲係大台監製嘅錢國偉睇中，先喺節目《變身男女 Chok Chok Chok》中，做Chok之天使「吹波糖」，同喺《五覺大戰》入面做神獸「講唔猿」，亦因為咁，白雲就曾經同錢國偉緋聞，咁當然錢監製最後就情歸另一味之天使嘅「雜果賓治」陳宛蔚，佢就今日同江俊霖結婚，各自找到最愛。

提到佢個名「白雲」，佢當年接受專訪就講過：「之前有好多人笑我個名，因為有味餸叫白雲鳳爪，所以咪唔要個鳳字，保留番族譜個雲字，啱啱好叫白雲。」至於未能入圍港姐，白雲就自嘲可能自己太肥先唔能夠入圍喎！