一連兩場嘅關智斌（Kenny）處男紅館演唱會，昨晚（13/9）中秋節開鑼。原本檔期係Boy’z演唱會，但因拍擋張致恒（Steven）臨門一腳，爆出一腳踏五船醜聞，令個唱胎死腹中，Kenny籌備已久，花下一番心血差點前功盡廢。

不過Kenny亦因禍得福，英皇旗下有份量的歌手古巨基、容祖兒、Twins及舊愛張敬軒傾巢義助做嘉賓，妹仔大過主人婆之下，處男騷最後成事。

睇Kenny處男個唱，除咗睇佢一身練成鋼嘅肌肉，當然就係要佢班嘉賓，個個唱得talk得，笑爆全場。

Kenny多謝古巨基，除咗佢係第一個撲出嚟話義務撐佢嘅人，當晚一套露腰嘅歌衫，亦係出自基仔設計。基仔仲爆Kenny係紅館首位歌手，換衫要換埋底褲嘅歌手。

到祖兒出場，Kenny最益呢位師姐，赤裸上身肌肉任摸。不過摸完Kenny副澎湃胸肌後，祖兒有驚人發現，就係Kenny個肚臍冇清潔乾淨，發現黑漬成取笑位。

講到全晚高潮，當然就係舊愛張敬軒上台，上演一幕「相敬如斌」演唱會，全程軒仔大玩有味笑話。而呢對有情有義嘅舊伴侶，合唱完嚟個深情擁抱，佢倆之間嘅愛，真係一切盡在不言中。

9月2日起升級條件將更新 繼續每月撐壹仔 講真心話撐住我香港！