喺香港嘅賽馬世界，究竟係邊類馬最多？是雄馬？雌馬？還是閹馬？心水清的馬迷都知一定係閹馬，喺香港，賽馬主要係跑馬，而喺外國賽馬除咗係跑馬，仲諗埋育馬，即係配種。咁香港啲馬係咪都唔諗配種呢？又唔係嘅，只係比較少啫，而比較近期成為配種馬的，就有前香港盃盟主「事事為王」，據知仲有50匹馬女等住同佢交配。要成為種馬，當然要係雄馬或雌馬啦，咁香港現役嘅雄馬又有幾多呢？原來就有32匹。牠們留住男兒身，唔多唔少都係為咗配種，而為了提升配種價值，當然要多贏大賽。現役雄馬中，最高評分就係摩廐「多名利」（124分），呢匹馬上季贏咗2400米一級賽香港瓶，但贏大賽就冇人嫌多，除咗可拎到賽事獎金外，又可對日後配種叫價大有幫助，所以日後如見到呢匹馬再跑大賽就要加倍留神。