韓國男團Super Junior(SJ)成員崔始源早前因愛犬涉咬死人而引起爭議，不過近日就輪到另一成員金希澈被網民批評。

希澈孖隊友銀赫、神童及女團MAMAMOO隊長Solar合作推出新歌《Charm of Life》，歌曲由希澈親自作詞，噚日公開後部分歌詞卻引起爭議，令歌曲被過份關注及解讀，甚至有網民批評希澈透過歌曲發表「討厭女性」嘅言論。

希澈隨後喺Instagram發文解畫：「歌詞中『喜歡我或討厭我的人都有，在討厭、喜歡、厭女、厭男中來回遊走』講嘅係我喺大眾眼中嘅形象，再講喇，邊有絕對嘅男性唔好或者女性唔好？做壞事嘅人先唔好。引起紛爭嘅話又會令我珍惜嘅粉絲感到難過，所以一直都忍住。但有啲人杜撰太多謠言，令我媽媽及姐姐傷心，大家和平相處，幸福生活唔好咩？點解要咁嬲話我係討厭女性嘅人？」

希澈續指：「就好似好多人咁，無論對方無咩職業、年齡、性別，我都會尊重，我只係佢哋嘅其中一份子，我哋都會互相關愛地生活。我嘅孩子一直以嚟都辛苦喇，今次就簡簡單單地載圖上傳喇。愛着世界上所有『正常嘅男性及女性』嘅金希澈敬上，不論男女老少，大家都幸福地度過年末喇。」

更多韓流，喺晒《娛果》
http://fb.com/appledailyent