慕名到駱克道合發食全港最貴公仔麵，成四十蚊碟，認真巴閉。同場巧遇光頭Z，原來剛剛收舖。光頭Z喺隔籬銀座間舖生意唔錯，加上Z做過Model，叫座力自然大增，唔少妹妹仔都借幫襯親近。光頭仔話演藝生涯原是夢，開舖只為未來鋪路；光頭Z曉居安思危，比起其他大公司高危中層醒得多。
講起銀座，最掂首推MC太子哥，一口氣租下幾間舖賣時裝，都算係淡巿勇士。MC太子哥原為印刷廠太子爺，屬頭號裏原宿迷，數年前已經係日本水貨舖最大客仔之一，出手闊綽拍得住歌手Edison。兩年前由客人變做老闆，喺銀座開舖做原宿水貨生意，講真當時反應麻麻，直到今年趁租平大事擴張，包起幾間舖整靚裝修引入更多牌子後，人氣即時急升，引嚟一班闊衫闊褲大背囊嘅後生人流，十足十小裏原宿咁，唔少行家聞風即落去開舖分杯羹。
最開心係大業主，之前個場被間虐畜寵物店嚇到客人雞飛狗走，𠵱家成功轉型成日本時裝場全靠MC太子哥。

主持人：大食Jack
八卦熱報：[email protected]