憑韓國選秀節目《PRODUCE 48》出道嘅限定女團IZ*ONE日前來港出席年度樂壇盛事《MAMA音樂頒獎禮》香港場，並於會上奪得新人獎，成員是次來港更抽空接受本報訪問，分享宿舍生活。

提到IZ*ONE當中有三位日本成員，矢吹奈子坦言覺得學韓文好難，不過韓國成員都會好親切咁教佢韓文，因此都學得好開心。日本成員又透露好鍾意食芝士熱狗，平時喺宿舍都會嗌好多芝士熱狗嘅外賣。

IZ*ONE透露，之後如果有機會，都想一齊拍攝跟旅行有關嘅綜藝節目。是次來港，IZ*ONE表示想睇夜景、去夜市同周圍去玩，之後有機會都想跟香港歌手合作，而且都想盡快來港開騷。

主辦《MAMA》嘅CJ E&M金顯修局長提到今年《MAMA》嘅十周年，坦言一開始舉辦《MAMA》時都有好多困難，比較難邀請海外歌手，但現時已經容易咗好多，好多歌手及藝人都想參加《MAMA》。提到《MAMA》多年都喺香港舉行，局長表示因為香港係文化及經濟中心，好多人都會經過香港，而佢哋都物色緊新地方，例如日本亦係一個好大嘅音樂市場。

金顯修局長亦提到多年嘅《MAMA》演出中，佢最難忘陳奕迅嘅演出，大讚對方一個人都可以控制及帶動舞台氣氛，令其他歌手都非常投入。至於連續兩年都搵宋仲基擔任司儀，局長表示每年都會搵最當紅嘅藝人出席活動，例如之前亦曾邀請過劉德華擔任嘉賓，因為希望海外嘅歌手及藝人都可以參與盛事。

更多韓流，喺晒《娛果》
http://fb.com/appledailyent