當年今日
關於我們

夏日球驗客:朗拿度跳唔成草裙舞

蘋果日報 2002/08/09 00:00


朗拿度話走又走唔成件事有兩個版本。正統講法係皇馬放棄斟介;不過坊間亦流傳件事由頭到尾都係朗拿度同佢經理人搞出嚟,根本係跳草裙舞博加人工。我求大俠唔知邊個版本真,但假如係後者,朗拿度就真係無品到極點囉。
如果佢真係咁做,枉國米白養佢兩年。踢過國米嘅路明尼加都話朗拿度趁自己當紅就同國米攤牌講條件唔啱。到呢一刻我求大俠都唔希望朗拿度跳草裙舞嘅講法係真,身為球王為咗博加人工,而俾全世界話佢反骨,有無咁蠢呀?

留意蘋果波經新形象
隨住德甲聯揭幕,新球季可以話正式開始,我哋蘋果波經亦會以全新形象同大家見面,今屆名家擂台除咗有喺有線講波大獲好評嘅本港球星丘建威畀貼士外,喺ESPN講波以中肯見稱嘅何輝亦加入戰團。咪話我求大俠唔醒大家,蘋果波經嘅攻勢會一浪接一浪,下嗰禮拜重有英超革新版出擊,千祈咪錯過!
荷杜買人走火入魔
做領隊當然希望可以買到好球員,增強球隊實力爭錦標,之但係好似熱刺領隊荷杜咁,似乎有少許走火入魔。早前簽唔成李華度同羅比堅尼之後,摩連迪斯又唔夠錢買;但係荷杜一廂情願咁話重有機會,重傳會炒李察士嚟幫補吓。我求大俠就覺得買球員都係可遇不可求,話晒李察士喺後防線幾重要,況且摩連迪斯都唔想去熱刺,到時出現「雙失」局面重弊。

米高波爾黑足兩季
有時買新球員都好講運數,好似蘇格蘭格拉斯哥流浪咁,上季買咗米高波爾之後,打咗十一場就膝頭受傷,飛去美國醫咗大半季,以為可以喺新球季亮相,點知傷勢無進展,上星期又到美國做手術,話要等到明年先可以比賽,球員同球會都算「黑仔」囉!