新鴻基地產（016）越來越多猛人坐鎮！新地獨董陣容一向粒粒皆星，已有王于漸、利豐馮國綸、賓架梁高美懿等等，新近請埋有「公職王」（過去式）之稱嘅范鴻齡（圖）做獨董㖭。
69歲嘅范鴻齡以往身兼多項公職，因捲入中信泰富2008年炒燶外匯槓桿式合約一案，辭去所有公職。舊年4月范鴻齡等人獲判無罪，范鴻齡終於可以重出江湖，舊年10月先獲委任為政府成立嘅「檢討自資專上教育專責小組」成員之一，之後再獲香港興業（480）委任為獨立非執董，家陣做埋新地獨董，有全面復出之勢喎。
有趣嘅係，范鴻齡身家豐厚，估計一定有投資股票，新地如此一隻優質藍籌，佢竟然一股都冇！不過唔緊要，最重要係新地大股東郭氏第三代以後可以有事請教佢。