李思捷首次自導自演賀歲電影《一家大哂》，論卡士一人當然未夠熱鬧，今次思捷幸運地請到狄龍大哥、元秋、蘇玉華幾位實力班底，合演一家人帶出歡樂給廣大觀眾。一家人日前喺尖沙咀接受傳媒訪問，思捷講解為何會有呢個題材構思，因為自己係八十年代人，屋企同枱食飯冇手機呢回事，當年的家庭樂與現今有異，仲話：「以前真係會攬住屋企人，依家會有距離，科技出現發達係好，但家庭緊密冇以前感覺，想憑套戲提示做返核心。」

喺銀幕上經常以江湖大佬姿態現身嘅龍哥其實都好幽默，思捷畀咗個花名龍哥，叫做「百厭道理龍」。思捷坦言喺眾多拍檔中邀請龍哥最艱難，要先過龍嫂嗰關，再過龍哥嗰關，龍哥話：「我驚佢搞笑整蠱我，佢喺螢幕上成日整蠱人，我話打聽清楚先啦。一個新導演有人肯投資俾佢已經過咗第一關，劇本又寫得豐富，最緊要可以同秋姐合作，七小福我全部合作過，唯獨秋姐冇，今次好夢成真，秋姐做我太太，仲係騎住我嗰隻，即係食住我。」

英雄片定喜劇吸引？龍哥話：「今次個機會好似搭順風車咁，我本身好鍾意睇戲，咩類型戲都睇，呢個劇本講一家人齊齊整整，同聲同氣，我地以前笑人結婚，有咩大事男人渣主意，小事女人管，點為之小事？問下老婆咪知囉，男人應該能屈能伸，依家學識咗『都是我的錯』（國語tone），一家人就和和氣氣，自己操心大意唔識女人感受，『都是我的錯』，咁就好開心成功維擊家庭咁多年，男人認低威就啱，我都會教個仔，女人為家庭嘅付出男人估計唔到。」龍哥呢個對答好溫馨浪漫之餘一定氹得龍嫂好開心，短短幾句言談己經好好揮有趣一面，龍哥戲中仲會將語言天份大派用場，包括講法文、英文、普通話。

思捷首次自導自演好興奮，仲話憑佢電視台多年訓練，做足功課難度唔算好大，除咗秋姐、龍哥、阿蘇之外，仲有羅家英同林敏驄呢啲搞笑能手，思捷話：「阿驄真係娛樂圈最煩友，佢角色做我哥哥，每次叫埋位佢就擔住枝煙，叫佢擺扺枝煙，佢又話見唔到。」似乎好唔俾面現場前輩，問到龍哥會唔會想教訓阿驄？龍哥話：「我好欣賞佢首《愛在深秋》寫得咁好，好有才華嘅年輕人，唔算難頂，佢個人好似舊雲咁儲緊嘢。」

阿蘇好欣賞今時今日拍戲竟然有圍讀，多得思捷引領專業，思捷話：「圍讀要做，令大家熟識，又可以冇咁陌生。」龍哥話：「成個電影製作最怕資源錯配，錯配就變廢物，廢物利用又變資源，今次咪將我廢物利用咗，佢本身有才華，李翰祥導演同我講過，人生三大樂事，洞房花燭夜、金榜題名時、得英才而作育之，今次睇咗劇本，年輕人有機會，我地應該喺旁邊拍手支持，我覺得你係一個高明導演，因為你為觀眾帶嚟歡樂。」電影有笑有淚，秋姐有場戲係會感人爆喊，啲情感戲嚟到就即流淚，秋姐話：「睇你自己內心諗咩，一啲都唔難，要我做喜劇仲難，引人笑難過喊。」

場地：故宮薈

蘇玉華
化妝：Vinci Tsang@TUVW
髮型：Renton Hung@via iI colpo

精選娛聞，喺晒《娛果》
http://fb.com/appledailyent