林欣彤(Mag)同埋老闆王祖藍今日去到商台宣傳新歌，Mag大讚祖藍係個好老闆，會配合佢所有要求，同時又會尊重佢嘅創作，Mag話：「知道佢好忙，試過錄一個demo俾佢聽，佢真係用心聽完仲可以唱番出嚟，我好感激。」

除咗出碟，王祖藍計劃為Mag籌備音樂會，Mag話：「我出道以來從未開過個人售票騷，無論演出場地大與小都想開。」王祖藍笑言:「 Mag係我嘅搖錢樹，佢從來冇蝕過錢，佢開演唱會我唔拖累佢，佢唱年輕人嘅歌，我都係唱番流行經典50年算。」