人逢喜事精神爽，近日家有喜事嘅賭王，氣色果然唔同晒。噚日去港大陸佑堂出席校慶儀式時，八方見佢表現精靈，雖然要坐輪椅入場，不過進場後好風騷，主動同老友social，彤叔、四叔見到賭王，紛紛同佢握手，好歡喜咁，後來賭王見到李超人，更主動打招呼兼握手。
大人物李克強現身，陸佑堂內各人要站立歡迎，賭王雖然行動不便，但仍然由超瓊扶住企咗起身，有啲腳震震少不免，企咗幾十秒，佢先至坐低。儀式後李克強離開，全人類又要企起身恭送，賭王再次企起身，都係企咗一陣就坐低。
大孖沙雲集陸佑堂，考慮參選特首嘅范太，獲安排坐喺李超人旁邊。早前李超人公開撐唐英年，范太話平常心看待，噚日兩人碰頭，八方見到范太不時同李超人咬耳仔，似乎有唔少嘢要把握機會傾掂佢。如果同李超人咬耳仔後有決定，范太今日出席香港婦協服務中心開幕禮時，可能有嘢公佈喎。