正所謂上陣不離父子兵，眼見老竇蕭若元放數收貴利咁好搵，搞電影嘅蕭公子亦決定做財仔。
蕭定一做主席嘅中國3D數碼（8078），近月頻頻上報，上個月先同網絡作家向西村上春樹買咗《東莞的森林》嘅版權，上個星期又有新搞作，就係做埋財仔生意。
據講，中國3D早前向一名獨立人士放數100萬，為期半年，月息1.2厘（即年息14.4厘）。搞搞吓電影，何解無端端走去做財仔呢？蕭主席解釋話，一直有搵新商機，考慮到收息會帶來穩定收入，打算做埋借貸生意。

睇番中國3D個債仔，佢係用窩打老道一個物業作抵押，華華check過，業主之前用600幾萬買入個單位，今次已經係第三按，熟行情嘅同事話，炒家將物業三按套現再炒過好常見，仲話中國3D收1.2厘月息算係好搵，蕭公子幾有生意頭腦。
其實財仔生意，蕭公子都係效法佢阿爹蕭若元，記得「才子」做主席嘅無限創意（8079）一早已經做緊財仔生意，物業炒家更加係佢哋嘅主要客仔。舊年年底，有「東涌富婆」之稱嘅唐穎耀就同無限創意借咗1000萬銀，但就要畀高達2.333厘月息，薑始終係老嘅辣，蕭公子要慢慢學嘢喇。

李華華
mailto:[email protected]