鄭嘉穎終於娶老婆喇，唔少圈中好友都戥佢開心。同嘉穎相識多年嘅一班好兄弟，無論峇里地震有幾危險，都要赴湯蹈火出席婚禮。

今早未夠9點鐘，唐文龍(Michael)、曹永廉，仲有黎耀祥同太太先後到達機場準備出發。唐文龍與鄭嘉穎同年出世，嚟緊都就快49歲，唐文龍都有感而發話﹕「識咗佢咁多年，終於都識到人生重要嘅人，好戥佢開心。」記者話嘉穎都搵到，幾時輪到你，會唔會叫嘉穎介紹後生女仔認識？唐文龍呆咗幾秒唔識答，身邊嘅曹永廉就代解圍﹕「嘉穎搵咗咁多年都係得一個，佢點樣可以介紹到俾佢(文龍)吖。文龍有好多方法嘅，唔使驚。」文龍就話﹕「都係靠自己啦。」

問到送乜俾嘉穎，阿廉話﹕「帶Michael嚟就係好好禮物啦，真正禮物就冇攞過去，遲啲先送。今次主要去飲飲食食，其他都唔清楚，希望參與一場盛大婚宴。」

而祥仔就透露買咗飾物送俾新娘子，祥仔話﹕「應該啱佢，好開心見到佢哋結婚。祝福白頭到老，年生貴子，開開心心。」祥仔透露最近忙拍新劇《殺手》，所以後日就返港，佢話﹕「今朝都拍到三點，一朝早就嚟，好彩之前向劇組請咗假。」

精選娛聞，喺晒《娛果》 http://fb.com/appledailyent