單係考車牌都肥幾次嘅你，會唔會想像到有人可以天才到隨意駕駛任何交通工具呢？
《D-LIVE天才駕駛員》嘅故事係講主角斑鳩悟受僱於ASE（AllMightySupportEnterprise），所謂ASE，是一間接受任何特殊委託的公司，內部雲集世界各地所有界別的專業人才，而斑鳩悟的專業技能就是懂得駕駛任何交通工具，可以話係一個天才駕駛員。雖然他經常抱怨呢份兼職人工太奀，而且參與的任務又艱辛兼危險，但每當坐上新式交通工具時，他心裏其實是有一定滿足感。

1條電線令電車Stop

毫無疑問，《D-LIVE》嘅題材的確幾新鮮，而且能夠發揮想像力的地方都幾多，故事初期結構比較簡單，即係一個故事裏面主角要駕駛一種交通工具，當中亦夾雜住一啲駕駛理論或行內知識，例如提及到原來將金屬線綁在路軌上，就會令日本JR鐵路的電車誤以為有列車停在路軌而自動發出停車信號，雖然係咪真確就真係要專業人士先知，但作為讀者又的確睇得幾過癮。
唯一可惜係故事後期劇情同主題有出入，主角同惡勢力對抗嘅橋段，更令佢似特務多過似駕駛員，反正係特務都預咗佢乜車都識揸，所以佢係天才駕駛員呢個MainPoint就變得薄弱，成個古仔失去重心，要睇特務我不如揀占士邦！