冇咗莫雷拉，大家都會話潘頓玩晒！這位應屆香港冠軍騎師，於今午（2日）新馬季開鑼日原本出師不利，頭兩場均出擊做阿二，手風似乎麻麻。

不過戲肉一到，潘頓即使出看家本領，第三場一班1200米特首盃，潘頓策告東尼馬房大熱「勝得威」後上一攻而破，贏出本季首項錦標，亦取得個人新季第一Win，兼且是潘頓第三度稱霸特首盃。

至於「勝得威」跨季三戰兩捷，分別攻下沙田銀瓶三級賽及特首盃，今場單Win及組合獨贏A1分別派33及18.5元。

這次特首盃告東尼雙龍出海，冷門「加州福星」於吳嘉晉胯下沿途貼欄領放，拉快了步速，大熱門「勝得威」在潘頓胯下沿途守第五位，留到最後百多米，從外叠以勁勢脫穎而出小勝馬頸位，從中造就告東尼從練首奪特首盃。

賽後由特首林鄭月娥頒獎給告東尼、潘頓及「勝得威」馬主梁高美懿丈夫梁承達等人，梁高美懿賽後表示十分高興，可與孫兒一起拉頭馬。

韋達嫡系座騎「軍歌」末段沿內欄發力上前，向「勝得威」越迫越近，可惜為時已晚只得亞軍，三、四名分別是「有理共想」及「加州福星」。

其中藝人薛家燕、陳欣健等入場為「有理共想」打氣，可惜只得季軍，4.2倍馬WQ齊撻，演出不過不失。