林芊妤(Coffee)、陳蕊蕊、鄧詠雪（雪子）等噚晚喺尖沙咀出席活動，Coffee條裙嘅布料疑太薄，令Bra邊現形。Coffee透露準備開瑜伽學校，因為自己係一個完美主義者，係買地方，唔係租，都幾豪氣！

Coffee話﹕「一定要大裝修，我又想就啲學生，學校最好喺港島區，希望唔過一千萬啦！」Coffee話近排好努力接Job搵錢，一連接咗好多關於運動嘅節目，一日又教11、12堂瑜伽，佢大呻﹕「真係人都癲！」問點解唔叫男友資助？佢話：「佢話可以投資，但唔好喇！情侶間唔好牽涉太多錢銀。其實我都諗咗一、兩年，可能搵啲志同道合嘅瑜伽朋友一齊教。」。

講到佢最近俾菲律賓網民攞咗啲相，冒認係佢同網友玩Webcam，Coffee話：「就係唔紅先畀人扮到都冇人知呀，不過佢用我啲相嘅Post仲多人Like過我本人，可能我去嗰邊都會幾受歡迎，我皮膚夠黑啩！」

而蕊蕊最近亦希望引進美人魚泳式入香港，佢話﹕「外國興咗好耐，但香港得一個教美人魚嘅老師，好多人唔明係乜嘢，所以我想推廣呢個運動。我學到新動作之後，仲可以搞水底跳舞班，所以我都練緊潛水，依家可以閉氣兩分半鐘。」而雪子都有學，並透露會以美人魚身份推出旅遊書，帶讀者遊印尼及帛琉等地方。(寫真集？)唔敢當，上身係三點式，有貝殼圖案，下身係美人魚鰭。」