2017年，市場開始關注樓市97泡沫重現。經歷1997年新盤損手的美聯物業住宅部行政總裁布少明直言，現時買家心態及市場氣氛都幾似九七，好多準買家心態就是買到就會賺，買到就會贏，「今日不買聽日後日升到買不到，現時似九七追入市」。但從數據分析，健康程度好過九七，當年「摩貨」差不多每月千宗，現時有「SSD」（額外印花稅），炒不到，得用家及長綫收租，供樓負擔比率亦比1997年低，當年比率「係九成幾等爆」，現時比率亦未夠一半。

再者，當年信貸資料庫不成立，好多人買幾間，周圍都借到盡，今日有信貸資料庫，超過一層樓只借好少，又有壓力測試，銀行借貸比九七嚴謹很多，97年好多無實力的人都揸幾層樓，「而家我見到買家普遍實力好過九七」。不過，始終樓價好高，已出現輕泡沫，「見到30零歲打下都好多要父母幫上車」，但未見大泡沫，由輕泡沫去到大泡沫至泡沫爆破需一段長時間，未來兩年年料樓價仍上升。過往經驗，由輕泡沫吹到大泡沫，都需要一年至兩年時間，除非息口及經濟變化好大，否則兩年內沒有爆破危機，樓價跌幅亦不會多於兩成。

他認為，一旦樓市調頭向下，有兩類物業最高危，包括一手高成數樓花及細價樓，近年不少新盤提供超高成數按揭，最高借足八成半及九成，若跌價兩成即變負資產﹔這兩至三年，細價樓亦升得幾犀利，「通常升得高，沉底越快，這兩類物業跌市風險最大。

今日亦冇摩貨，當年的瘋狂今日樓市未見到，「我成日同同事講笑，如見到師奶夾錢炒樓，記住通知聲，到時個樓市便有危機。」此外，今日仍有好多在1997年輸過的地產，到今日仲未敢入市，仲租樓住，九七輸得咁緊要，見到仍有部份人保留，有別於1997年全民都認為樓價會升，一買即賺的瘋狂情況。

記者：朱連峰

掌握財經生活資訊，即Like「蘋果ATM」fb專頁啦！
http://fb.com/appledailyatm