【「熊」出沒】遠征澳洲冇帶戰衣！范邦初：馬房咁都夠膽死
熊系專訪范邦初
范邦初鍾意Bear Bear熊公仔，名下馬都係以熊命名現役有「又係熊」、「滿冠熊」、「戰熊三千」，隻隻都贏過馬。
最威水係已退役嘅「熊英雄」贏過六場，仲衝出香港，養馬超過30年，有唔少難忘事。
他說：「喺美國養過一匹馬女叫『女兒熊』（Bear Fan），贏過級際賽，試過遠征杜拜，被選為最佳短途馬。」
「有次喺紐約贏一級賽，雖然我冇到場，但係養馬以來最開心一次。」
「最蝦碌嘅事，要數到2011年霍利時訓練嘅『熊英雄』，遠征澳洲古摩亞育馬場錦標，點知馬房唔記得帶埋綵衣，去到出賽前先發現，騎師柏寶惟有着當地馬會提供嘅白色綵衣。」
「當時我已唔多開心，加埋隻馬一出閘就甩蹄鐵，搞到腳傷跑包尾，更加激氣。」
「最搞笑嘅事，就係有次練馬師蘭尼（已故）喺馬場同我講，有攝記影緊我哋，不如扮睇馬簿同電算機。」
「其實當時我哋嘅話題，根本唔係講馬，只係閒話家常，諗番起都覺得好笑。」
范邦初係美國公民，經常港美兩邊飛，上季7月離港前「又係熊」贏馬拉頭馬餞行。
佢希望疫情可以快啲過去，到時返港唔使隔離一大輪至可以入場睇跑馬，以及見番班好耐冇見嘅可愛Bear Bear「熊」馬仔。
-----------------------------