「演藝界對我嚟講唔係演戲咁簡單，係一個家。做戲唔係我嘅工作，係我事業，我爸媽係演員，兩個細佬係演員，細佬嘅太太係演員，爾冬陞嘅爸爸係我繼父。」Paul哥說。

「爾家有做演員嘅，有一個做化妝師，有一個做攝影師，對我嚟講，呢行，係我嘅家。我同人講笑，唔單止係家咁簡單，今日秦沛我，有好多好多老婆喎！我有好多好多仔女喎！隨便擸幾個都好犀利，除咗Benji、Lesley之外，好多仔仔女女，數數埋埋嚇死你，全部都有名，個個到依家，一係叫我『阿爸』、『老竇』、『Daddy』，太多啦！」

兒女成群，一定問：「最錫邊個？」「個個都錫，見到都攬。鍾嘉欣結婚，張枱卡片都寫住『Daddy』。影相齊晒港姐，『Daddy！過嚟影相！』企埋去唯一男嘅就係我；胡杏兒結婚，佢話：『阿爸我結婚啦，嚟飲啦！』，去到同人介紹：『呢個我老竇，呢個我阿爸。』人哋唔知邊個係邊個，因為佢親生老竇嚟㗎嘛！」諗起個場面，Paul哥仍忍不住甜笑。

「仔仔女女都好多，華仔又攬，仲有Aaron；女主角都犀利，孫儷、周迅，全部都係我仔仔女女，所以演藝界對我嚟講，唔係一個工作地方，係家，係屋企。」

Paul哥在大銀幕、公仔箱演盡慈父角色，但現實中，父親卻早逝。童年缺少了父愛，令Paul哥引以為憾。「我6歲囉，爸爸走咗，好辛苦。我11歲阿媽嫁畀爾冬陞老竇。繼父好嚴肅，一個幾嚴厲嘅爸爸，相處唔係好多年，佢都走埋。」那如何演繹各種「慈父」神緒？「揣摩出嚟，睇人哋老竇點樣做，但自己做老竇就麻麻哋。」

「老竇死得早，得唔到所謂（父愛）...盡可能畀仔女多啲，但同時因為要畀仔女多啲，所以好少機會陪佢哋成長，佢哋喺加拿大，我就太空人咁飛嚟飛去，少咗好多喺一齊嘅時間，呢樣係自己比較遺憾。佢媽咪教得好，大學畢業，佢哋選擇做娛樂圈，亦都怪我自己，我同佢哋講，總之應承我，大學畢業，之後選擇自己條路，但點都諗唔到佢哋選擇娛樂圈，冇問題，最重要佢哋開心健康，對我嚟講已OK。」

說到與父親的回憶，還是有的。Paul哥三歲入行，拍第一部電影《父母心》，之後亦有跟父親合演電影：「4歲拍都有印象，因為老竇抱我，最乖㗎，因為嗰個係真老竇，戲入面佢叫我：『過嚟過嚟』，然後攬住，你第二啲三唔識七，點攬呀？」

採訪：余燕儀
攝影：林德雄
攝錄：廖達燊
場地：DADA Bar + Lounge @THE LUXE MANOR

精選娛聞，喺晒《娛果》
http://fb.com/appledailyent