【韓流】李民基涉性侵後回歸作 庭沼珉唔覺得有負擔
李民基庭沼珉今生是第一次
由李民基及庭沼珉主演嘅tvN熱播韓劇《今生是第一次》於上月尾播畢,結局一集更高收4.931%收視率,劇組台前幕後嘅工作人員更到濟州島進行休假。休息完女主角庭沼珉就繼續開工,日前接受韓媒訪問時就大談劇中「老公」李民基,大讚對方好照顧自己。
大前年8月低調入伍嘅李民基,卻喺去年7月當兵時期捲入性侵案,雖然最終證實李民基無嫌疑,但已經令佢形象受捐。提到《今生是第一次》係李民基嘅回歸作,令外界都相當關注,拍攝時期有冇感到好大負擔?庭沼珉坦言冇擔心過,亦唔覺有負擔:「因為係第一次同李民基合作,而且之前都冇見過面,所以唔知對方係個點樣嘅人。不過首次見面後,發現佢同我想像中好唔同,不過佢同劇中角色(南世熙)都有相似嘅部份。而且李民基係出道多年、有好多拍攝經驗嘅人,身為後輩嘅我學到好多嘢。」
庭沼珉續指:「李民基拍攝時好照顧我,就好似拍攝第一場吻戲時,當時我哋仲未好熟,所以拍完大家都有啲尷尬,不過佢率先照顧到我嘅感受,仲一齊睇拍攝效果,所以合作起嚟都冇唔舒服嘅地方。」
更多韓流,喺晒《娛果》
http://fb.com/appledailyent