爵士北上，拜見壽爺，今次榮獲壽爺御握手長達十一秒，直頭破晒紀錄！
爵士亦知道喺特區遭到虎狼猛獸包圍，處境凶險，一個唔覺意叉錯步，即時遭到咬噬！所以佢步步為營，連幾時辭職，幾時宣布參「選」，吓吓跟足劇本分場、分鏡頭，搞到連廖暉都要坐喺度等佢慢慢三跪九叩，檻火盆、碌柚葉洗身、搽番梘、噴古龍水，焗住話「表示理解」！
梗係喇，特區反曾大聯盟一計不成，又生一計，呢一回，由愛國人士出面，提出要每個三司十一局，各設一個「政治顧問」，聲稱係「培養治港人才」！
呢一招，擺明就係學自毛澤東嘅「摻沙子、挖牆角」，每個政府部門，由「政黨」（由又紅又左嘅民建聯包辦就最好喇梗係）打口長釘入去，派駐一個黨委支部書記，名為「顧問」，查實就喺每一層每一格，都將公務員架空，隱性大奪權！
老左呢一招，都咪話唔厲害！愛國力量講到明，最仇恨就係「公務員治港」，見中央下令，司局長一個不能郁，即是冬冬、太子章，連肥平，都可以做埋落去，咁啲北角愛國幫咪半個壽包都分唔到？

「雙槍黃英姑　上井崗山打游擊」

於是就提出「政治顧問制」，搞滲透，睇吓你曾餘孽點樣交代！唔肯呀？咁就咪怪我老左唔客氣，一於由蔡菜子帶頭，做「雙槍黃英姑，上井崗山打游擊」，宣布你煲呔係反動政權！
查實若果中央懵唔晒，一諗就知：呢啲就叫添煩添亂，無事生非！一局一個政治顧問，由民建聯包辦，咁民主派會點？分幾個畀民主派，咁咪即是民主共治？政治顧問孭唔孭鑊？每個部門安插一個公公，裏應外合，同親中政黨打眼色，分分鐘連啲政府文件，亦漏晒出去畀立法會，咁點樣叫「行政主導」！
簡直係放屁。煲呔未出世，土共就想搞到佢唔足月，一生出嚟，要放喺個氧氣箱，跟住靜靜雞拔喉管！安插「政治顧問」？香港何來咁多「政治人才」？夠斤両做到政治顧問嘅，掃掃埋埋有幾多人？公務員體制，日日柴米油鹽要做嘢，有乜嘢義務同某一兩個政黨去培養「人才」，俾佢踩住自己膊頭，責任唔負，彩就攞盡！反曾亂港勢力密謀削弱行政主導，煲呔呢兩年，煩過廢董！


爆料熱線：29290000、27860099
報料傳真：26239278
報料電郵：[email protected]