新世界發展上個禮拜公布業績，不過盤數就麻麻哋冇驚喜，純利倒退咗近三成半，主要都係冇新盤推售，同埋投資物業重估增值跌咗30個巴仙。唔知係咪因為業績唔省鏡，噚日，彤叔鄭裕彤即刻出招「三代同堂」沖喜吓，提升孫仔鄭志剛做執董，旺一旺成個新世界集團，等遲啲分拆新世界百貨都事事如意。
𠵱家新世界集團旗下兩大上市公司：新世界發展由彤叔親自做主席，阿仔鄭家純就係董事總經理；新世界中國彤叔自己冇職位，純官就係主席兼董事總經理，純官個仔，即彤叔個孫鄭志剛，就由上個禮拜五開始，成為兩間上市公司嘅執行董事，年薪過百萬，單係新世界一年人工就有144萬，新中都唔弱，有72萬，兩個執董職位仲要花紅另計。
鄭志剛今年先得27歲，仲係美國一級學府哈佛大學學士畢業，年輕有為，睇嚟城中又多一個鑽石王老五。鄭志剛喺舊年9月入新世界做董事總經理助理，即係嗲哋純官嘅左右手嘞，而之前就曾喺瑞銀做過幾年。

新世界一門三傑，三代同堂，唔知彤叔係咪諗住早啲培訓個孫仔成才，等自己可以早啲退休全職炒股呢？彤叔啱啱先話入股做緊路演嘅中信1616，嗰頭又話睇緊就嚟路演嘅碧桂園。講做生意孫仔要向爺爺多多學習，論炒股孫仔亦未必夠爺爺咁好眼光。
噚日彤叔出席大連市同香港合作發展論壇之後，就話將會喺大連市投資10至20億，預期回報有成20至30個巴仙㗎。對於上個禮拜公布新一個財年嘅勾地表，彤叔話對咩地皮都有興趣。
[email protected]