當年今日
關於我們

《流氓大亨》中的觀塘|方以文

蘋果日報 2018/03/09 16:00

劇集專欄流氓大亨地區消息蘋地方以文

So What﹗各位電視迷對《流氓大亨》最深刻嘅印象,可能係最後Do姐瞓喺醫院一滴眼淚,或者係萬子哥大叫嘅一句So What﹗不過其實呢套劇嘅外景,都非常值得大家留意,尤其係東九龍嘅居民,因為劇中會出現大量觀塘舊區嘅環境。
劇裏面萬梓良所繹演嘅方謹昌係警察,而佢負責行更嘅地方就係觀塘,所以有唔少嘅鏡頭都係喺觀塘取景。第一集萬子同伙記食宵夜同追捕犯人嘅地方,仲有萬子吳啟華第一次相遇嘅地方,都係喺觀塘裕民坊近物華街一帶,鏡頭裏面仲可以見到舊觀塘地標之一嘅匯豐銀行。由徐小鳳主唱嘅《城巿足印》劇集片頭,就有觀塘碼頭打工仔落船嘅情況。而萬子一家人住嘅地方,就係喺九龍灣麗晶花園取景。
呢套喺1985至86年 拍攝嘅電視劇,記錄低已經失去嘅觀塘舊區風光。觀塘巿中心喺2008年已經開始重建。如果大家喺APM高層望返落去觀塘巿中心,依家會見到昔日四四方方嘅街道,被機器穿到一個一個圓形嘅窿,插滿咗建築鐵枝。舊事變新唔係絕對嘅壞事,但將舊區翻新之後,住宅價格亦都隨時翻幾倍,舊居民有冇能力返嚟住都係問題。舊社區人際網絡被拆散,相信唔少人會覺得可惜,有人會話呢個係城巿進步嘅必經階段。或者往事只能回首,電視劇記錄低嘅情境因為劇情故事需要,未必百分百真實,但令到舊街坊可以透過劇集回味一下舊時生活點滴,同時睇到Do姐、萬子哥嘅精彩演出,總算係一件賞心樂事。

專欄作者簡介:
方以文
電視迷,未成精。睇好電視。
Facebook link:
https://www.facebook.com/fongeman/
empty
昔日四四方方嘅街道,已經插滿咗建築鐵枝。
empty
empty
empty
empty