房屋委員會停售居屋五年，終於有機會將倉底貨尾推售，頭炮只許成功不許失敗，但睇過其賣樓廣告嘅人都批評廣告有取巧之嫌，叫人不禁要掩住半邊嘴笑。廣告以三幢門形容三個屋苑嘅優點，黃大仙嘉峰臺一推門就可見維多利亞港，但實情只有小部份單位可見維港一隅，仲未計算日後東九龍發展後被高樓大廈遮擋所失去嘅海景；沙田愉翠苑則擺明車馬只有「園林實景」，其他一概乏善可陳。
最搞笑係天水圍天富苑，推門竟可看見汀九橋同西鐵！究竟係天富苑搬咗，還是汀九橋搬咗？答案原來可以喺售樓書中找到：「……座落輕鐵天富站旁，坐輕鐵到天水圍站接駁西鐵出市區……」原來經輕鐵搭路，天富苑同西鐵仲係近在咫尺；而「……居民可利用三號幹線，經汀九橋迅速往返市區……」係經過而唔係睇得見！不過居民如選乘西鐵，就唔會睇到汀九橋。冇咗西鐵同汀九橋，天富苑究竟有冇賣點？