53歲韋家雄今日小登科，迎娶比佢年輕近20歲嘅女友鄧楚雅（Keynes），早上十時，韋家雄一身中式禮服現身酒店準備接新娘，而兄弟團成員都係同家雄一樣係「綠葉」出身，包括有楊明、戴耀明、李啓傑、葉暐、易智遠等。

新郎哥同一班兄弟企喺門口供傳媒拍照，有成班兄弟喺身邊，新郎哥即刻生猛晒，家雄話：「今日成班兄弟分晒組㗎喇，嗱，佢哋呢面係爆破組嚟嘅，佢（易智遠）就負責爆門、戴耀明就負責做門攝攝住道門，到時再加多一腳，另外班兄弟就負責對付班姊妹，一對二咁夾住晒佢哋。」咁使唔使分埋談判組？佢哋成班兄弟笑言唔使，之後葉暐就拎住一封利是話會寄掛號，家雄笑言：「啲錢我哋成班兄分晒佢，到時就寄個信封去，入面寫住『無言感激』。」

咁今晚係咪都分配好兄弟幫手頂酒？成班兄弟即刻指住家雄笑言：「係佢幫我哋頂啊，係佢請我哋返嚟今晚『隊』佢。」楊明話：「唔畀酒佢飲佢會發脾氣㗎！」家雄笑言：「我平時都會拎啲酒精打落自己個身入面，我自己負責飲，佢哋會負責『隊』我㗎喇。」

精選娛聞，喺晒《娛果》
http://fb.com/appledailyent