新馬季明日（2日）開鑼，冠軍練馬師蔡約翰兵源依然充足，但卻冇派馬出賽，今季能與其爭冠軍者，非東尼哥哥莫屬，首日即佈下馬海戰術急攻攞頭彩。

另外不少人認為韋達有能力威脅潘頓，計我話會唔會數漏黑馬田泰安？講到騎師，我兩位靚女拍檔一定有不同意見，今季鐵三角組合，以馬論馬，以事論事，實行三個女人三個墟。

講番推介，揀選第八場三班1400米，來自新人王羅富全的「一舖成名」，上季尾落班孭重磅即勝，暑期後狀態水準有升無跌。近日連場下雨，場地質素難免受影響，此駒擅戰變化地，升班負磅不重有力一爭。

「神龍駒」上季自購馬身份到港，四歲良駒適應能力比預期快，季前試1000米短途閘猶有餘勁，配腳可兼顧；「芙蓉莊」質新仍有進，但遇雨戰能力打折扣。相反「威進駒」黏地性能較好，同程未甩前四名，兩駒可作配腳選擇。

第六場可留意「快樂寶貝」及「喜得福」，前駒有班次之利，轉廐後埋門操練已見有作戰水準；後駒1400米前速雖未及「怪獸都市」，但按理外檔有機會走前免蝕位競跑，個人認為寧走勿留。

北上從化後神色不俗，七歲馬「喜得福」評分已調整至有利水平，老馬利季初固然有可博之道；而三歲馬「龍城勁將」於1400米跑法會較被動，蠱惑B欄賽道難估計利弊，論馬狀態已磨利，廐主季前備戰積極，是次排好檔可加入考慮。

無疑能大機會自造控步速的「怪戰都市」，評分雖未至有利水平，但用見習生潘明輝減磅只負124磅，擺前走加上內檔有助，三甲好穩。