當年今日
關於我們
官恩娜透視露Pat招人妒
鄭融:唔通我淨著褲咩
蘋果日報 2006/09/17 00:00
官恩娜、鄭融前晚以表演嘉賓身份喺灣仔出席芝華士IBIZA型人活動,官恩娜前晚搶盡風頭,身穿金色bratop襯透視吊帶背心,並配搭黑色透視四個骨褲,當佢喺台上載歌載舞時,金色bratop若隱若現,加上佢條四個骨褲非常透視,整個臀部線條清晰可見,十分誘人。
雖然鄭融都身穿背心同短褲,但性感程度完全遜色,問佢知唔知同場嘅官恩娜非常性感,鄭融有啲唔多高興大寸對方話:「唔通我淨係着條褲咩?唔使喇,呢啲唔啱我,我係嚟唱歌嘅。」同鄭融講話官恩娜都係嚟唱歌喎,佢就即刻兜番話:「所以我好佩服佢,我暫時做唔到。」
怕跌倒換波鞋
大出風頭嘅官恩娜原本着住對高踭鞋到場,但佢喺台上勁歌熱舞嗰時,就換番對波鞋,因為怕個舞台太滑而跌親,問佢着得如此性感招致鄭融妒忌,官恩娜好識做話:「佢都好靚吖,佢啲鞋好靚㗎,我成日都問佢啲鞋喺邊度買,我同佢冇嘢噃,都OKfriend㗎。」
官恩娜之後仲解釋自己點解着得咁性感,佢話:「因為個party係金色同黑色,我尊重大會先咁着,總之大家各有各靚啦。」
身穿透視裝嘅官恩娜,載歌載舞時金色bratop若隱若現,就連整個臂部線條也清晰可見(圖),十分誘人。
左起:官恩娜、鄧穎芝同鄭融前晚打扮靚靚咁出席活動,不過就以官恩娜最搶鏡。
提到官恩娜嘅出位打扮,鄭融(中)話自己只係嚟唱歌表演唔使着成咁,擺明寸對方。