麥明詩同王宗堯今日喺中環出席「第六屆香港國際手工啤酒節」，佢哋即場試飲啤酒同玩遊戲，麥明詩話自己喺英國讀書時，放假都會同朋友飲下嘢：「我自己好有節制，所以酒量都係一般般，會飲到好興奮，但唔會飲醉，飲少少個人會好放鬆，同朋友傾得好開懷，同異性都有啲feel，不過我都係同朋友飲，所以唔怕搏懵。」宗堯就話：「o依家都係飲開心酒，試過同Paco飲，佢開咗兩枝威士忌，再開一枝中國白酒，佢係一日飲三輪，抖完繼續飲，我就唔得喇！」

講到噚晚舉行嘅港姐總決賽，已經投咗一票嘅鄭裕玲（嘟姐）再以「終極一票」選出冠軍，惹來網民質疑「選港姐冠軍仲兒戲過選班長」，麥明詩話：「我有留意，呢個世界冇乜嘢係絕對公平，但係可以喺平台上展現自己嘅努力，都係某程度上嘅公平。」問佢有冇貼中心水？佢話：「我同朋友開盤，中咗冠軍同季軍，其實除咗樣之外，所需求嘅嘢亦都好多，好似說話、人際關係，比起樣更重要，樣靚周街都係，我覺得冠軍好有獨特性，幾有自己嘅諗法，幾有趣。」

對於好友伍樂怡（Kelly）大熱倒灶，麥明詩話：「我貼佢係三甲之一，不過當晚冠軍嘅表現比較自然、比較投入，我覺得呢個女仔係好有魅力，靚唔靚就見仁見智，當然我都覺得可惜，我想勉勵佢（Kelly），名次嘅嘢冇乜所謂，觀眾唔使戥佢唔抵，有人氣支持，都可以令佢有更多工作機會，反而有名次就唔代表有工作機會。」

提到團體「香港手語來自聾星」曾經去信無綫，希望喺港姐競選播映期間，可以為失聰人士進行即時手語傳譯，不過無綫以時間緊湊為由而拒絕，麥明詩表示有留意呢段報道，佢話：「其實手語係值得推廣，但係我明白製作係好急，好多嘢都係前一日先confirm，每一刻都改緊，嗰個時間未能應付係可以理解，我相信電視台都想有個共融社會。」