之前「關懷愛滋」(AIDSConcern)呢個機構，搵咗日本著名AV女優京香Julia嚟香港，幫手拍咗一條宣傳片，借一啲經典AV場面，嚟呼籲啲人要帶套，進行安全性行為。

今次佢哋再接再厲，搵咗「鴨王」何浩文（Dominic）同林耀聲合作，拍咗條片宣傳定期檢查嘅重要，對象就係一班同志界嘅男生。條片抵死地方，就係用咗好耐之前陽光檸檬茶嘅廣告橋段「乜咁啱嘅」嚟玩，其實好多年前周星馳套「破壞之王」已經用過一次，女主角喺鍾麗緹。

今次移花接木變咗兩位男士，故仔講林耀聲暗戀Dominic，千方百計想識佢，最後反而係Dominic主動送上一朵菊花，同遞上一包紙包「菊花查」，可謂語帶雙關，無非都係想用輕鬆手法，呼籲各位兄弟「早查早安心」，有病趁早醫。

Dominic接受本報電話訪問，佢話覺得可以重演一個經典廣告好開心，佢講笑話：「做唔到周星馳嘅角色搞笑有啲遺憾，不過就好有意義可以幫到AIDSConcern宣揚正面意識，叫人及早檢查同及早對應。」不過講到拍攝嘅時候都好辛苦，熱唔在講，一分鐘唔夠嘅宣傳片轉咗幾個場地。兩位演員都好專業，雖然演同志，但就冇尷尬，而且好多鏡頭都係點到即止。