大市上周五下晝又忽然大跌，正當有啲大好友以為周二單日大跌500幾點係調整完成之際，淡友再次發功，恒指三兩吓手勢，又跌穿18700點，填埋上周四個上升裂口。照睇圖，上周二大裂口跌穿10同20日線，之後雖然連續兩日反彈，但卻無力重上呢兩條平均線，下跌裂口當然亦冇補到。上周五再以大陰燭下跌，雖然未有質穿周二低位18618，但疲態已現，短期應該要回試番50日線18362點左右，呢個位可以先下一注。
大市氣氛麻麻，反而提供機會買平貨，𠵱家先物色定一啲有潛力嘅股份，到價即刻上車。揀乜嘢股？中油香港（135）係其中一隻可考慮嘅股份。隻股上周五收4.12元，跌3仙。由於過去兩個交易日成交大增，網上又見散戶熱烈討論。
「香港討論區」內，SC3388上星期五上網留言：「今日成交好大，gogogo……月底睇$5。」
superkkk156就冇咁樂觀：「呢隻股想升又升唔起，咁快又回番，4.10好走。」
占事癲都唔敢抱太大期望：「如果到咗$4.5冇咩力，我都會走。」
翔比較睇好：「我估計係因為857龍頭已經升咗好多，破埋$10，所以大戶開始炒上135追落後，4.5或以上絕對有機。」

4蚊買入　目標睇$4.5

油價近期由55美元低位急速反彈上63美元附近，圖表上有機會挑戰68美元，石油股表現生猛，其中最矚目嘅係中石油（857），上星期五再創歷史新高，最高見10.08元，中油表現相對落後。
中油上星期五雖然高開低收，但由於已升破10、20同50日線，MACD亦現雙牛買入訊號，技術走勢向好，調整正係買貨時機，可候4元買入，首個目標4.50元，跌穿3.80元止蝕。
余文