啱啱喺上個月生咗囡囡梁浸浸嘅鄭希怡（Yumiko），噚日同埋陀B 7個幾月嘅名模Cara G.，仲有鍾舒漫齊齊出席喺上環舉行嘅「TOMS世界無鞋日」。今次係Yumiko生咗囡囡之後首次出席活動，佢話囡囡𠵱家體重6磅幾，已經改咗中文名：「BB叫子柔，個子字我改，柔就係爸爸改，佢鍾意個柔字，想B女溫柔啲，覺得我唔夠溫柔。」
講到湊女生活，Yumiko話𠵱家每日都好忙：「醫生叮囑我哋要三小時餵一次奶，自己唔敢偷懶，本身冇諗住餵人奶，但餵完後，囡囡健康咗，所以keep住餵。」問到點樣補人奶？佢話：「飲我最憎嘅魚湯，以前完全唔飲，因為覺得好腥，𠵱家為咗BB要飲。」

做黑面 冇得揀

Yumiko表明唔會寵壞BB？佢話：「我睇咗啲書，話BB喊時唔好抱，要佢唔喊先抱，BB最長試過喊20分鐘，老公第一個忍唔住（抱B），我媽咪係第二個，不過我通常會畀三次機會老公，多過三次會阻止，我𠵱家做黑面，老公做白面，我唔想，不過冇得揀，始終有個要惡啲。」至於會唔會再生B？佢笑笑口話：「為咗個魚湯唔會再生，不過我唔諗再追，有佢一個已經好足夠。」Yumiko仲話想等BB磅數大啲、再強壯啲先再決定搞唔搞百日宴。
撰文：馮仁昭